Thursday, June 18, 2009

وكمان تاااج


التاج المره دي من صديقتي العزيزه ايمي صاحبة مدونة غلطه مطبعيه
وطبعا بشكرها جداعلي التاج والكلام الجميل اللي قالته عني قبل اي كلام :)

اسمك ؟؟

طيب عاوزين اللي بجد بجد ولا اللي كده وكده ؟؟
هو اللي كده وكده أينو

سنك ؟؟
واحد اتنين تلاته
عشره
خمسة عشر
اه كده يبقو 23 سنه

اسم مدونتك ؟؟
رقة الاحساس

مجال درستك ؟
سكرتاريه وادارة اعمال

صورتك الرمزيه في المدونه بتعبر عن ايه ؟؟
صورة شمعه يعني امل في شعاع النور وسط الظلام
وكمان انا بحب الشموع جدا واشكلها
وبحس براحه ودفا في المكان لما بقعد علي اضائتهم

هل فكرت في اغلاق مدونتك ؟ والسبب؟
الحقيقه اه مره
والسبب احب احتفظ بيه لنفسي
بس رجعت ومش هانت عليه ذكريات حلوه شوفتها فيها :)

ايه رد فعلك لو حد قل ادبه عليك في المدونه ؟
الحمد لله عمرها ماحصلت بس لو حصل لاقدر الله
انا مش بعرف ارد واخد حقي
فاهروح افتن عليه عند فوكس
وهو هيجبلي حقي منه تالت ومتلت

اسوأ مدونه دخلتها؟
مره اول لما بدأت تدوين دخلت مدونه وطلعت وحشه اوووووي
بس الحمد لله ولا فاكره اسمها ولا شكلها لاني خرجت منها بسرعه

هيحصل ايه لاايميلك بعد لما تموت ؟

هو في احتملين لو انا كبيره وعندي بنوته هسبلها الميل في وصيه مسوجره ليها تدخل تشقر عليه وترش ميه وتلمع الارضيه وتسلم علي صحابات مامتها ويفتكروني بالرحمه ولو مش عندي اكيد الله يرحمه معايا بأه


عطيت الباسورد لحد قبل كده؟
اه مره اديته لفوكس كان بيظبطلي حاجات ومش عندي مشكله
اني اديهوله تاني
لاني ده انسان انا من يوم ماعرفته استأمنته عليه مش هستأمنه علي حتت ايميل ؟

السفر بالنسبه لك؟

متعه وتغير جو واهم حاجه بأه بلاقي نفسي اللي بتكون ضايعه مني بقالها كتير

المود بتاعك ايه ؟

متقلبه يعني حبه تلاقيني مهيسه وحبه اكون جد جدا بس بكره النكد


بتعمل ايه في وقت فراغك ؟

بحب اوووووووووي وحط تحت اوي خطوط كتيره احمره الشغل اليدوي
وبعمل حاجات فعلا لجهازي واشيلها

بحب القرايه اووووي
برضه
مؤخرا بدأت احب الانترنت وبأه بيشغل جزء من وقتي
واحيانا الكتابه علي قدي كده

الاكلات المفضله ؟؟
بحب الاستيك والمشويات عمتا

الصفات اللي اخدتها عن ولدك ؟
الصبر وطول البال
ولما اكون متضايقه اكتم جوه نفسي
وده غلط جدا وانا عارفه كده بس بحاول اتغير

الصفات اللي اخدتها من ولدتك ؟
ههههههههههه
انا وهي بنحب اي حاجه مرسوم عليها ورد
في اللبس في الصور في التلفزيون اي ورد بيلفت نظرنا

وطبعا هي الاساس وانا اخدت ده منها


اكتر ست حاجات بتحبهم ؟
فوكس
والبحر
والهدوء
والحب
والرحمه
وبحب اخترع في الاكل
ههههههههههههههههههه

اكتر ست حاجات بتكرهم ؟
العنف
الخيانه
الكدب
الاستغلال
عدم الرحمه
وعدم الاخلاق
والمنافقين
كده 7 يلا مش مشكله

شخصيتك نوعها ايه ؟؟
هاديه جدا جدا وانطوائيه جدا ومش سهل اخد علي حد بسرعه
ومش عارفه في حاجه تاني ولا لا

لماذا دخلت عالم التدوين من الاساس ؟

دخلت عالم التدوين عجبتني فكرته رغم اني قعدت فتره مش عارفه
اكتب ايه ولا اعمل
ايه بس بعد كده لقيته عالم لذيذ بيحتوي اي حد بيلجأ ليه :)

احلي جمله قيلت في وصف مدونتك ؟
اتقلي كتير اني المدونه بتاعتي اسم علي مسمي
وبجد كنت بفرح اوي بكل حد قالي كده
لاني اعتبرته نجاح في
اختيار اسم حاجه بتعبر عني في العالم الجميل ده :)

اهميه التعليقات بالنسبه لك ؟

رأي الناس في كلامي وخصوصا الناس اللي بثق في أرأهم وكلامهم ليه
ده جزء لا يتجزء ولا يقل اهميه من البوست اللي بنزله
وبيتعلق عليه وبفرح جدا بكل تعليق سوء نقد بناء او كومنت علي البوست ومناقشه فيه

احلي بوست كتبته وضع اللينك مع ذكر السبب ؟
اجابتي هتكون في جزئين الاول هقول في البوست اللي بحبه وبحب اقراه عندي
هو هنا
الجزء الثاني هو اتمني من كل حد دخل مدونتي يقولي بالنسبه ليه
افضل بوست كان ايه وده كلام بجد اوعو حد يزوغ من الاجابه :)


افضل مدونه قرائتها ؟
انا بدخل مدونات كتيره اوي من غير مااسيب كومنت فيها
بس اي مدونه انا دخلتها وسبت فيها تعليق
ده معناه اني بحبها اوي وبحب كلام واسلوب تفكير الشخصيه
اللي بتكتب اي كان المجال


الشغل بالنسبه لك ؟
وجع دماغ
ووجع قلب
وقلة راحه
وقلة نوم
وفي الاخر بيتصرف المرتب
علي الدكتره من اللي
بيجي للواحد بسبب الاذكياء اللي بنتعامل معاها


اهمية الانترنت بالنسبه ليك ؟
زي ماقولت قبل كده اهمية بالنسبه ليه ظهرت مؤخرا
لانه بياخد جزء كبير من وقت فراغي يشغله في حاجات ممتعه
يعني اكلم حد اتابع مدونات العب في الفيس بوك وكده :))

تمرر التاج ده لمين ؟؟
طبعا ومن غير شك اللي بدبسه كل مره ( فــــوكــــس

وكمان مني احاسيس
ومني ساعات ساعات

وباربي اوقات فراغ لوتسمحلي
حاسوباتيه
محمد غاليه
واي حد يحب يتفضله طبعا من غير شك يتفضل المدونه مدونته :)

Thursday, June 11, 2009

تاااج القراءه

جالي تاج من صديقتي العزيزه مني (احاسيس )والتاج بصراحه مميز بالنسبه ليه لاني عن حاجه انا بحبها جدا جدااااااا

بسم الله نبدأ التاج :)

ماذا يمثل لك الكتاب ؟
خير جليس شئ بيعطيك وبيزودك من غير ماتطلب منه

هل القراءه تغير من حالتك النفسيه ؟ وما أثر القراءه عليك بوجه عام ؟؟
اكيد بتغير من حالتي النفسيه كتير يكفي اني لو حاسيت بالوحده في وقت وفتحت كتاب اي كتاب بياخدني من مودي ده ويعيشني معاه اوي
واثر القراءه عليه بوجه عام اشعر انها تغذي روحي

اول كتاب قريته ؟ واخر كتاب ؟
اول كتاب قريته فكراه جدا هي مجموعة قصص اطفال اسمها كتاكيتو
وكانت مجموعه حلوه اوي من كتر ماكنت بحبها كنت بقراها كل يوم
اخر حاجه روايه اسمها غريبان في القطار

اذكر ثلاث كتب أو قصص أثروا في حياتك وتحتفظ بهم ؟
السيره النبويه العطره
كتاب لاتحزن
والي حبيبين

في أي المجالات تحب أن تقرأ ولماذا ؟
في اي مجال احس انه هيفدني ويضفلي جديد او بمعني اصح هنمي جزء جديد من عقلي

هل عندك مكتبة وكم عدد الكتب بها في تقديرك ؟
عندي مكتبه خاصه بيه صغنونه كده علي قدي
مش فيها كتب كتير بس كل كتاب فيها بعتز بيه جدا جدا

اذكر اسم كاتب تتمنى أن تحتوي مكتبتك كتاب له ؟
كريم الشاذلي اسطورة الحب

ماهو الكتاب الذي يرافقك في السفر ( غير المصحف )؟
مش فيه كتاب معين علي حسب وقتها انا بكون نفسي اقري ايه

ماهي الجريدة أو المجلة التي تتابعها وما هي أهم الأعمدة فيها؟
للاسف مش بتابع اي جرائد ولا مجلات وكده احسن لاني مش بقي فيهم حاجه تفرح
لكن في مجلات علي النت بحب اتبعها

ماهو أفضل كتاب أهدي لك ؟ وأي الكتب تهديه ولمن ؟
الهديه المهداه لي مجموعة شعريه لفاروق جويده
اللي نفسي اهديها نفسي اهدي لشخص عزيز عليه اي كتاب يكون قريب لقلبه

إذا كنت بمعرض للكتب كيف تتعرف على الكتاب الجيد ؟
عنوان الكتاب او لو كان في سيمبل عنه او اسم الكاتب طبعا

ما هو المكان المفضل لك للقراءة ؟ وهل لك طقوس خاصة وقت القراءة؟
غالبا بيكون في قوضتي

الرواية – القصة القصيرة – الدين – السياسة – العلوم –
الشعرمن الأحب لك في كتاب تلك الفروع ؟
بحب القصه القصيرة والشعر

كمان انصحنا بخمس كتب ترى فيها إفادة عظيمة؟
بصراحه لا املك النصيحه لسبب اني القراءه
اذواق يعني ممكن حاجه تعجبني اوي بس مش تعجب حد تاني

رجاء ارسل التاج على الأقل لنرسخ مبدأ تبادل السلطة
هبعته لفوكس ( الكيت كات ) لانه برضه بيحب القراءه جدا
وشمس النهار
وحبة صمت تجاوبه لما تخلص الامتحانات ان شاء الله

واي حد عاوز ياخده يتفضل طبعا :)