التاج المره دي من صديقتي العزيزه ايمي صاحبة مدونة غلطه مطبعيه
وطبعا بشكرها جداعلي التاج والكلام الجميل اللي قالته عني قبل اي كلام :)
اسمك ؟؟
طيب عاوزين اللي بجد بجد ولا اللي كده وكده ؟؟
هو اللي كده وكده أينو
سنك ؟؟
واحد اتنين تلاته
عشره خمسة عشر
اه كده يبقو 23 سنه
اسم مدونتك ؟؟
رقة الاحساس
مجال درستك ؟
سكرتاريه وادارة اعمال
صورتك الرمزيه في المدونه بتعبر عن ايه ؟؟
صورة شمعه يعني امل في شعاع النور وسط الظلام
وكمان انا بحب الشموع جدا واشكلها
وبحس براحه ودفا في المكان لما بقعد علي اضائتهم
هل فكرت في اغلاق مدونتك ؟ والسبب؟
الحقيقه اه مره
والسبب احب احتفظ بيه لنفسي
بس رجعت ومش هانت عليه ذكريات حلوه شوفتها فيها :)
ايه رد فعلك لو حد قل ادبه عليك في المدونه ؟
الحمد لله عمرها ماحصلت بس لو حصل لاقدر الله
انا مش بعرف ارد واخد حقي فاهروح افتن عليه عند فوكس
وهو هيجبلي حقي منه تالت ومتلت
اسوأ مدونه دخلتها؟
مره اول لما بدأت تدوين دخلت مدونه وطلعت وحشه اوووووي
بس الحمد لله ولا فاكره اسمها ولا شكلها لاني خرجت منها بسرعه
هيحصل ايه لاايميلك بعد لما تموت ؟
هو في احتملين لو انا كبيره وعندي بنوته هسبلها الميل في وصيه مسوجره ليها تدخل تشقر عليه وترش ميه وتلمع الارضيه وتسلم علي صحابات مامتها ويفتكروني بالرحمه ولو مش عندي اكيد الله يرحمه معايا بأه
عطيت الباسورد لحد قبل كده؟
اه مره اديته لفوكس كان بيظبطلي حاجات ومش عندي مشكله
اني اديهوله تاني لاني ده انسان انا من يوم ماعرفته استأمنته عليه مش هستأمنه علي حتت ايميل ؟
السفر بالنسبه لك؟
متعه وتغير جو واهم حاجه بأه بلاقي نفسي اللي بتكون ضايعه مني بقالها كتير
المود بتاعك ايه ؟
متقلبه يعني حبه تلاقيني مهيسه وحبه اكون جد جدا بس بكره النكد
بتعمل ايه في وقت فراغك ؟
بحب اوووووووووي وحط تحت اوي خطوط كتيره احمره الشغل اليدوي
وبعمل حاجات فعلا لجهازي واشيلها
بحب القرايه اووووي
برضه مؤخرا بدأت احب الانترنت وبأه بيشغل جزء من وقتي
واحيانا الكتابه علي قدي كده
الاكلات المفضله ؟؟
بحب الاستيك والمشويات عمتا
الصفات اللي اخدتها عن ولدك ؟
الصبر وطول البال
ولما اكون متضايقه اكتم جوه نفسي
وده غلط جدا وانا عارفه كده بس بحاول اتغير
الصفات اللي اخدتها من ولدتك ؟
ههههههههههه
انا وهي بنحب اي حاجه مرسوم عليها ورد
في اللبس في الصور في التلفزيون اي ورد بيلفت نظرنا
وطبعا هي الاساس وانا اخدت ده منها
اكتر ست حاجات بتحبهم ؟
فوكس
والبحر
والهدوء
والحب
والرحمه
وبحب اخترع في الاكل
ههههههههههههههههههه
اكتر ست حاجات بتكرهم ؟
العنف
الخيانه
الكدب
الاستغلال
عدم الرحمه
وعدم الاخلاق
والمنافقين
كده 7 يلا مش مشكله
شخصيتك نوعها ايه ؟؟
هاديه جدا جدا وانطوائيه جدا ومش سهل اخد علي حد بسرعه
ومش عارفه في حاجه تاني ولا لا
لماذا دخلت عالم التدوين من الاساس ؟
دخلت عالم التدوين عجبتني فكرته رغم اني قعدت فتره مش عارفه
اكتب ايه ولا اعمل ايه بس بعد كده لقيته عالم لذيذ بيحتوي اي حد بيلجأ ليه :)
احلي جمله قيلت في وصف مدونتك ؟
اتقلي كتير اني المدونه بتاعتي اسم علي مسمي
وبجد كنت بفرح اوي بكل حد قالي كده لاني اعتبرته نجاح في
اختيار اسم حاجه بتعبر عني في العالم الجميل ده :)
اهميه التعليقات بالنسبه لك ؟
رأي الناس في كلامي وخصوصا الناس اللي بثق في أرأهم وكلامهم ليه
ده جزء لا يتجزء ولا يقل اهميه من البوست اللي بنزله
وبيتعلق عليه وبفرح جدا بكل تعليق سوء نقد بناء او كومنت علي البوست ومناقشه فيه
احلي بوست كتبته وضع اللينك مع ذكر السبب ؟
اجابتي هتكون في جزئين الاول هقول في البوست اللي بحبه وبحب اقراه عندي
هو هنا
الجزء الثاني هو اتمني من كل حد دخل مدونتي يقولي بالنسبه ليه
افضل بوست كان ايه وده كلام بجد اوعو حد يزوغ من الاجابه :)
افضل مدونه قرائتها ؟
انا بدخل مدونات كتيره اوي من غير مااسيب كومنت فيها
بس اي مدونه انا دخلتها وسبت فيها تعليق
ده معناه اني بحبها اوي وبحب كلام واسلوب تفكير الشخصيه
اللي بتكتب اي كان المجال
الشغل بالنسبه لك ؟
وجع دماغ
ووجع قلب
وقلة راحه
وقلة نوم
وفي الاخر بيتصرف المرتب علي الدكتره من اللي
بيجي للواحد بسبب الاذكياء اللي بنتعامل معاها
اهمية الانترنت بالنسبه ليك ؟
زي ماقولت قبل كده اهمية بالنسبه ليه ظهرت مؤخرا
لانه بياخد جزء كبير من وقت فراغي يشغله في حاجات ممتعه
يعني اكلم حد اتابع مدونات العب في الفيس بوك وكده :))
تمرر التاج ده لمين ؟؟
طبعا ومن غير شك اللي بدبسه كل مره ( فــــوكــــس )ه
وكمان مني احاسيس
ومني ساعات ساعات
وباربي اوقات فراغ لوتسمحلي
حاسوباتيه
محمد غاليه
واي حد يحب يتفضله طبعا من غير شك يتفضل المدونه مدونته :)
23 comments:
ههههههههههههههههههههههههههههههههههههههههههههههههه
عــــــــــــــــــــثــــــــــــــــــل يا اينو والله
لا بجد اجاباتك حلوة جداااااااااااااا ماشاء الله
فعلا اجاباتك تدل علي انك انسانة رقيقة اوي
واجابتك عن شخصيتك هي كده فعلا بالاضافة الي انك تدخلي القلب من اول مرة الواحد يشوفك فيها
ــــــــــ
بس عجبتني اوي لما قولتي فوكس هيجيبلك حقك تالت ومتلت
هههههههههههههههههههههههههههههه
يعني فوكس واقف بالعصاية برة واي حد هيتكلم هياخد علي دماغه
ــــــــــ
هيحصل ايه لاايميلك بعد لما تموت ؟
هو في احتملين لو انا كبيره وعندي بنوته هسبلها الميل في وصيه مسوجره ليها تدخل تشقر عليه وترش ميه وتلمع الارضيه وتسلم علي صحابات مامتها ويفتكروني بالرحمه ولو مش عندي اكيد الله يرحمه معايا بأه
طب ولنفرض انك جبتي ولد هتعملي ايه؟؟؟؟؟
سؤال يطرح نفسه
هههههههههههههههههههههههههههههههههه
بجد عثولة اوي يا اينو
ربنا يحميكي يارب
اموووووووووووة
ثلام يا ثكر
إجاباتك حلوه أوووووووووووووووى
واضح إنك شخصية قلبها أبيض
ربنا يسعدك دايما
لا حول ولا قوة الا بالله هو انا لحقت افوق من التاج الأولانى علشان تدبسينى فى تاج تانى ؟؟؟ :)))
اجابات منطقية وجميلة جدا يا اينو وشكرا بجد على الكلام اللى قلتيه عنى :)
تحياتى وربنا يقدرنا على رد تاجاتك .. قصدى جمايلك :))
سفروته ...
اشكرك بجد علي كل كلمه قولتها في حقي حقيقي اخجلتم توضعنا
وبعدين طبعا فوكس واقف علي باب المدونه حد يقدر يهوب ناحيتها ده واقف هو والفرقه كمان مش لوحده
هههههههههههههههه
مهو الميل هدي للبنوته بس عشان انا هجيب ولد بيتكسف من صحابات مامته فا عمره ماهيفتح الميل هيتكسف باه وكده شوفتي التفكير :)))
هههههههههههههه
ربنا يحفظك ويخليكي ليا يانور ياعثوله انتي :)
محمد غاليه ...
ربنا يكرمك
اشكرك علي المجامله دي مرسي :)
نورتني :)
فوكس ...
وماله ده انا بعمل فيك حاجه حلوه بخلي الناس تتعرف عليك اكتر شوفت بأه
مرسي يافوكس علي كلامك والكلام اللي قولته عليك ده نبذه مختصره عنك:)
تحياتي :)
اينوووووووووووووووووووووووووو ربنا يخليكى ليا يارب
بجد اجاباتك فعلا تدل على شخصية رقيقة وناضجة وهادية
عجبنى الاجابة بتاعت الايميل هيحصله ايه بعد لما تموتى بعد الشر عنك يعنى
عجبنى جداااااااااااااااااااااااا كلامك عن فوكس ربنا يخليكوا يارب لبعض ويكبر الحب بينكم اكتر واكتر
مش فاهمة اول اكلة بصراحة الاستيك ولا تقصدى الايس كريم (وش مكسوف )
اه حلو اوى هفتن لفوكس وهو هياخدلى حقى ضحكتنى اوى
عسل يا اينوووووووو
هتاخدنى معاكى وانتى مسافرة المرة الجاية مليث دعوة بقى
وكمان انتى مدبسة محمد غالية ومنمن يعنى متدبسين متدبسين منى ومنك هههههههههه
اشرار احنا
نياهاهاها
تحياتى
ايمى
ايمي ...
اشكرك علي الكلام الجميل ده ويارب يرزقك بالزوج الصالح اللي تقولي عنه كلام احسن من كلامي عن فوكس ان شاء الله :)
الاستيك هو المشويات علي فكره غير الايس كريم طبعا عادي يعني مهو انا كمان بتقع تحت ايدي مصطلحات بقعد افك فيها 3 سنين يابنتي
ههههههههههه
خلاويص ماشي تعالي معايا وانا مسافره احنا المفروض لينا خروجه مع بعض ولا ايه ؟
ايون احنا ناس شريرين اووووووي
هااهاهاهاهاها
نورتيني ياسكره :)
مبرك التاج
تحياتى
بس فى الآخر ما ردتيش على سؤال الاسم
اكيد مستنية تاج تانى عشان يرد على سؤالك بسؤال تجاوبي عليه باسمك
صح ؟
اجاباتك جميله جدا
واحلا اجابه احساسك ان فوكس هو الحمايه والامان ومجايب الحق الاحساس ده جميل جدا
وكمان موضوع الورد ده احلا حاجه في الدنيا
انا بأحب الورد جدا جدا
ربنا يسعدكم يارب
لاسع افندي ...
الله يبارك فيك عقبالك :))
نورت رقة الاحساس في اول زياره :)
ياسر سليم ..
هو اينو مش عاجب حضرتك مهو اسمي برضه !
وعموما لو جالي 100 تاج بيسألوني عن اسمي هجاوب واقول اينو اصلي الاسم اللي بجد بجد سر محدش يعرفه
تحياتي:)
عمرو ...
اكيد احساس جميل جدا انا مع حضرتك :)
الورد مافيش اجمل منه انا بجد بحبه اوي علي الطبيعه وفي الرسومات وكل حاجه :)
نورتني في اول زياره لرقة الاحساس :)
اجابات جميلة
بجد بدل على حد واعى وعقل كبير
حاسس بكل اللى حوالينا
تحياااااااتى
اجاباتك تحفه ما شاء الله
وبجد ربنا يخليلك فوكس
وفعلا افضل بوست انا فاكرة عندك هوا قمرا غار منه وجه القمر
تحياتى
طائر الليل الحزين ...
اشكرك علي المجامله الرقيقه دي بجد
وكمان علي المرور والتعليق :)
نورتيني :)
blue wave...
مرسي ربنا يخليك
وكمان مرسي علي الدعوه ربنا يتقبل منك :)
نورتني :)
انا جايه اطمئن عليكى ويارب تكونى بخير
واسئلك سؤال
نسيانى ليه ياقمر؟؟؟؟
الشماعة
وبعدين فى الطــــــبع الغريـــب يا جماعة
كل واحد لغـــــلطة مفصــــل لـه شـماعة
يعلق عليها عيوبه ونفــــــسة الملتـــــاعة
ويدارى الخـــــيبة بدل مواجهتها بشجاعة
وهو فاكر عمل اللى عليه فى نفس الساعة
ولكنه زيه زى اللى بيحــــرق نفسه بولاعة
بعد فترة هيحس مدى التقصير والبشــــاعة
فى حق نفسه المغيبه وكأنه فى بلاعــــــة
ولا يبقى له غير الندم والعطش والمجاعة
=============
ناجح يوسف فهمى
عاشقة الرومانسية ...
اشكرك علي سؤالك عليه وانا طمنتك عليه هناك ومش اقدر استغني عنك :)
تحياتي
ابو المفاصل الواصل ..
الاول كنت بسأل ايه علاقة الكومنت بالبوست بتاعي !!
بس لما زوت حضرتك فهمت تقصد ايه علي العموم نورت رقة الاحساس في اول زياره :)
تحياتي :)
النت
كانما خلق النــــــــــــــــت لدول العالم التالت
لفضح مخازيه وتخلفه واحـــواله وما الــت
المتمسك بجهله المعادى للعلوم وما قالـــــت
المحب للدماء !وغير مهم ليه اريقت وسالت
ولا يستوعب اى دروس وعبر اتقالــــــــــت
وجه النت وجات معاه الحقيقة اللى زالــــــت
وابتدأ الناس تفهم والمعلومات توالــــــــــــت
=========
Post a Comment