Monday, December 22, 2008

حــــلــــم

تلك الفتاه
تستيقظ فجأه من نومها وكعادتها تنظر في الساعه
فتجدها الحادية عشر
تجلس وهي مستقره علي سريرها وتحاول ان تتذكر بماذا كنت احلم ؟ بماذا ؟
اه تذكرت كنت احلم بتلك المكان الواسع شديد الخضار من كل الجهات هنا وهناك
الزرع في كل مكان ماأجمله
وتجد نفسها وحيده فيه لااحد سواها هناك
في البدايه كانت تشعر بالرهبه ولكن سرعان ماأخذتها الطبيعه بين احضانها
وظلت تدللها واخذت تلعب الفتاه وتلهو وتجري هنا وهناك
!! وهي سعيده جدا بأن لايوجد هنا من ينظر اليها في استعجاب عما تفعل

فهي حره طليقه ! وظلت تلعب وتجري وتجري

!! وهي لاتعلم لماذا تفعل كل هذا

ولكن كانت تتمنا ذلك كثيرا في خيالها
وظلت تجري حتي ان وجدت طريق يفرق تلك الخضار فيجعله علي جانبيه

تلك الطريق ممهد جدا للسير فيه ويأخذها الفضول لتعرف بماذا يؤدي السير فيه

والي اين ينتهي ؟ سوف اسير فيه حتي نهايته لكي اعرف نهايته!

وظلت تسير في هذا الطريق واذا به قصير ليس طويل ولا هو ببعيد

وبدأت تظهر لها ان هناك من ينتظرها في نهاية الطريق !!

ولكن لاتعرف من هذا ولا تعرف من اتي به الي هنا !

اقتربت واقتربت منه حتي ظهرت لها ملامحه تلك الفتي عريض المنكبين

مابين الاسمر والخمري وتلك الملامح الهادئه والتي تزينها ابتسامه

رقيقه . ياإلهي انه هو انه من حلمت به فتي لي أحلامي

نفس الملامح والصفات والهدوء ماذا !! انه يمد يده الي انه يعرفني

ويبدو عليه انه كان ينتظرني كما انا انتظرته طويلا واحببته واحببت ملامحه كثيرا يافرحتي

واقتربت منه وهو ينظر الي عيني في ثبات وبنفس الابتسامه الساحره

وانا اكاد لا اصدق ماانا فيه ! وإذ به يأخذ بيدي ويقبل كل منها ويقول لي

انتظرتك كثيرا يااميرتي

اجبته وانا ايضا كنت انتظر لاني كنت لا اعرف اين انت ! فأجاب

نعم اعلم ذلك فلقد قدر لنا الله سبحانه وتعالي ان نكتمل اليوم يانصفي الحلو

طارت فرحا بكلامه واخذت تحدثه عن نفسها وهو ايضا يحدثها

وفجأه فتحت عينيها وهي جالسه علي سريرها وأحد ينادي عليها

من الخارج هيا لتتناولي الافطار

انهضي بسرعه

نهضت وهي تقول ليتني اقابله مره اخري لكي اصف له

كم انا احبه وكم اشتقت اليه !

Saturday, December 13, 2008

أعــشــق فــيــك الــجــنــون





حبيبي ...


احيانا .. اتمرد


علي العشق الثائر


وأحيانا ...


اعشق فيك .. الجنون


تشبه .. الطائر الحائر


محلقا .. تملؤه الظنون


نسي.. اين موطنه


وإلي اي ارض .. ينتمي


في كل الاوطان


...اسلم قدره


وظل يرفرف بعيدا


... وقلبي


هو .. الوطن الحنون


هو .. جزيرة الحريه


ونسيم الروح .. الحيرانه

... اراك في منامي

اري .. هذا العشق .. العطري

وشوقي الثائر .. يفتح زراعيه

ينادي .. بالحب الابدي

يضم .. الخوف الحائر

في صدر اللحن ... الدافي

... وعطر الشوق المشتاق

يختال في اللون الابيض

... وعشق الرغبه الوردي

يبحرني .. في البحر الازرق

... وتطوف كل الاحاسيس

كزائر الليل المسحور

في رداء .. من البلور

شفاف .. يرتدي الندي

ينادي .. الروح الظمأنه

يروي القلب المحروم

ونغمات الود .. تحلق مسافره

الي ارض الحب .. الخلايه

... تحمل معها

عطر الزمان

ورائحة الزهر الجذابه

وتنثر عبيرها .. بالكون

ليطوف .. بأرض الميعاد

فيها .. يكون التلاقي

بعد طيلة الغياب

فيها اراك حبيبي

اري البريق .. الذي عاد

والحقيقه .. بعد رحلة سراب
=======
منقول من ديوان اعشق فيك الجنون

Sunday, December 7, 2008

عــيــد ســعــيــد




كل سنه وانتم طيبين وبخير

ويارب كل حد عنده امنيه ربنا يحققهاله في الايام المفترجه دي

Friday, December 5, 2008

فـسـحه حـــلـــوه اوووووووووووووي


روحنا دريم بارك وكان يوم تحفه بجد من اوله


كان نفسي اركبها بس مش لقتها مش عارفه هي هناك ولا لالالالا


الصاروخ وقفت قدامه انا وفوكس نتأمل اللي بيحصل للناس وخدنا قرار بسرعه اننا مش هنركبه ولا نيجي جمبه هو والديسكفري


قطر الموت
ههههههههههههههه
فوكس كان بيقولي احنا كنا متعلقين من قفانا بس بعد النزول بتكون مش مصدق انك لسه عايش
ههههههههههههه

النهر السائر كان قافل يومها بس دخلنا المغاره اللي بيعدي منها واتفرجنا برضه


ااااااااه الشلالال غرقنا ميه وبعدين قعدنا ننشف بأه بس والله لعبه حلوه اووووووووووووي



وفي العاب تانيه كتير ركبناها زي عربيات السباق والعربيات المتصدمه وقطر الشرق والطحونه
بجد كان يوم مالوش حل
مرسي بجد علي اليوم ده يافوكس :)

Sunday, November 30, 2008

كــل ســنــه وانــت حـبـيـبـي

زي النهارده كان يوم خطوبتنا

============

بجد مرسي اوي لكل اللي سألو عليه

مني ( احاسيس ) - حاسوباتيه

ومرسي لكل اللي زارو المدونه في البوست اللي فات ولاقوني قافله الكومنتات



Sunday, November 16, 2008

شعور غريب

شعور غريب عندما تشعر بالحزن والالم ولاتجد من تفشي له اسرارك وتبوح له بحزنك

فتكتم كل ماتشعر به بداخلك ...ه

شعور غريب عندما تبتسم لك الدنيا لكن سرعان ماتسدل حزنها عليك وتجعل كل دائره بيضاء في حياتك

سوداء مظلمه كظلام الليل الدامس ...ه

شعور غريب عندما تحاول ان تخرج مابداخلك ولا تستطيع !!ه

شعور غريب لما يضيق بك المكان ولا تستطيع مغادرته فتبقي في دائره ضيقه

ثابت في مكانك دون تحرك

شعور غريب عندما تعجز كلماتك البسيطه في مجارات حزنك الكبير

فهم لا يفهمون تلك الكلمات البسيطه وانت لا تستطيع شرح حزنك بكلماتهم الصعبه

شعور غريب عندما تشعر بالوحده

Thursday, October 30, 2008

The Magic Egg !!










البيضه السحريه

يمكن الكل يستغرب من الاسم بس هي اسمها كده

دي عباره عن بيضه مصنوعه من الفخار وجواها بذره بتطلع زرعه مكتوب عليها عباره زي

I Love You

Happy Birth Day

وكده يعني

المهم طريقه استخدام البيضه دي انها تتكسر من فوق شويه كده

واسقيها يوم بعد يوم شوية ميه لحد لما بتكبر الزرعه ومكتوب عليها فعلا الكلمه اللي احنا مختارنها واحنا بنشتري البيضه

وبعد كده الزرعه دي بتنقسم 2 وبعدين تطلع ورقتين شجر يفضلو يفتحو لحد لما يبقو شكل قريب جدا من شكل قلب

وبعدين بتكبر تاني حاجه من بين ورقتين الشجر الله اعلم هتكون ايه لاني لسه متبعها

الصناعه طبعا الصين :))

كل ده كان وصف للمنتج اللي جالي هديه

انا بأه عندي سؤال وياريت اللي يعرف اجابته يقولهولي ضروري

=====================

يــــاتــرا الزرعه دي واللي بيحصل ده حرام ولا حلال ؟؟؟؟؟؟؟؟؟؟؟؟؟؟

====================
تحديث
------
بصو ياجماعه انا هوضح اللي فكرة فيه خلاني اسأل هي حرام ولا حلال بس حاولو تركزو معايا عشان احتمال يكون تفكيري ملغبط شويه
اول حاجه فكرت هي الفكره دي هما استوحوها منين ؟؟؟
لقيت اقرب حاجه للفكره دي انه احيانا ربنا سبحانه وتعالي بيخلق زرعه او ماشابه وبتكون مكتوب حاجات زي
لااله الا الله
محمد رسول الله
الله
محمد
وحاجات زي دي دلائل لي تثبيت المؤمنين علي قوة ايمانهم بالله وللمشركين علي وجود الله سبحانه وتعالي
وكمان دلائل علي قدرة الله سبحانه وتعالي علي كل شئ
هما بأه خدو الفكر ونفزوها بالشكل ده والاسلوب ده
انا حسيت انهم بيقلود صنع الله سبحانه وتعالي
بس في حاجات مش عارفه اوصفها ايه بالظبط
هي ممكن تكون هديه رومانسيه جدا
وحاجه تفرح انك تبعت لحد رساله حلوه او كلمه حلوه في شكل زرعه هو بيعتني بيها لحد لما تكبر وتوصلو الرساله دي
لكن بعد اللي قولته ده هي بأه ايه حرام ولا حلال !!؟؟

Thursday, October 23, 2008

عيدك عندي اسعد عيد

كل سنه وانت طيب
كل سنه وانت اجمل حاجه في حياتي
كل سنه وانت اكثر نضج واصوب تفكير وارشد عقل في نظري
كل سنه وانت حبيبي

Tuesday, October 14, 2008

قمرا غار منه وجه القمر

سألني... بماذا تحلمين حبيبتي ؟؟
سكت !!
ولكن شرد ذهني بعيدا
اخذني تفكيري داخل فقاعه في الهواء وذهب بعيدا
بعيدا لمكان لم تخطوه بشرا قبلنا ولن تخطو فيه بشرا بعدنا
حلمت بليله اسطوريه
{ ........................}
ليله مقمره بها قمران !!
قمرا في السماء وقمرا في الارض !
هناك >>> القمر الذي في السماء حبيبته نجمه تسكن بالقرب منه لكي تشعر بنبض قلبه
اما القمر الذي في الارض فهو قمري وانا حبيبته واشعر بنبض قلبه في كل مكان من حولي
يأخذ القمر بيد حبيبته النجمه ويرقص معها علي اعذب وارق الالحان
ويأخذ قمري بيدي انا حبيبته ويرقص معي مثلما فعل القمر في السماء مع نجمته حبيبته
يلتف القمر في السماء ونلتف ونتمايل معه
حتي يقف قمر السماء ويلوح لنا بيديه ويقول ...
اغار انا قمر السماء من قمر الارض
وترد عليه حبيبته النجمه وتقول نعم .. فحبهما فاق حبنا وكل الحب !!
فأخذ حبيبي بيدي وقبلها وقال لي
وهو عينه بعيني ...
لم اجد مثل عشقي لكي حبيبتي
استحت نفسي منك حبيبي
وانت تكرر لم اجد مثل عشقي لكي حبيبتي
وانا اردد احبك ياقمرا غار منه وجه القمر احبك
وفتحت عيني علي صوتك
تردد حبيبتي .. حبيبتي الي اين ذهبتي
ابتسمت وقولت لك >> ذهبت انا وانت مع القمر ونجمته
ياقمرا غار منه وجه القمر !!
============
عاوزه اقول حاجه
انا في حاجات حذفتها منها مش يعرف المحذوف غير الحد اللي اهدتهاله عشان المحذوف يخصه هو فااتكسفت بأه :$
تاني حاجه اني كتبها من زمان واهدتها كمان بس اللي فكرني بيها امبارح شكل القمر كان حلو اوي وقعدت افتكرتها كلمه كلمه وحبيت اعملها مفاجأه حلوه
يارب تكون مفاجأه حلوه بجد للي بهديهاله مره كمان :$:$:$:$

Monday, October 6, 2008

احبك صديقتي

هل رأيتم الليل حين يلقي ظلمته وينيره القمر
والارض عندما تجف وتموت فيحيها المطر
والحدائق حين تحزن وتلونها الزهر
صديقتي تشبه تلك الاشياء
رسمت في حياتي اجمل الصور
عندما تعصف الاجواء وتسقط الامطار
حين تقرع الاجراس وتبدأ الاسفار
كلما قست الدنيا وابكتني الاخبار
اجدها معي .. حتي اخر المشوار .
صدديقتي كاتمة اسراري وعقلا يناقش افكاري
صديقتي قلبا يسع ابحاري رفيقة كل اسفاري
وجــــــدتــك
نورا يضي سماء ليلي
وماء يروري ظمأي
ورفيقا يؤنس وحدتي
ومنديلا يمسح دمعتي
وشمعه تضئ ضربي
حقا لي انا افخر واسمو
حق الاشجار تتمايل وتزهو
حق الازهار ان تتفتح وتبهو
حق للطيور ان تغر وتشدو
عاهدتني بأن تبقي معي
عادهدتني بالوفاء والاخلاص
وها هو قلبي يقطع مع قلبك عهدا بأن نبقي احبه
لايفرقنا الا الموت
عهدا سأكون مخلصه لك وفية لحبك
وحقا سأوفي بعهدي ووعدي
اقولها من اعماق اعماق وجداني
احبك ضياء ينير دروبي
احبك صديقتي احبك
منقول
==============
لما قريتها شوفت فيها انتمتي بس قبل التغير
عشان كده نشرتها وانا بتمني انها ترجعلي زي زمان
ايد حنيننه بتطبطب عليه وقلب مش يقدر يستغني عني زي ماانا مش اقدر استغني عنه
حد تحس معاه بالامان لدرجة انه مافيش حد بيشوف دموعك الا هي
لكن دوام الحال من المحال !!!!


Tuesday, September 30, 2008

عيد سعيد


كل سنه وانتو بخير وصحه وسعاده

ويارب يكون ربنا جعلنا من عتقائه في الشهر الكريم ده ويكون غفر لنا كلنا :)


السنه الجايه ياااارب كل اللي بيحلم حلم ربنا يحققهوله :)

عيد سعيد عليكم :)


اتفضلو بأه كحك العيد انا عملاه بأيدي

كل سنه وانتو طيبين :)







Monday, September 22, 2008

الاستغفارات النبويه

* اللهم انت ربي لا اله الا انت خلقتني وانا علي عهدك ووعدك مااستطعت اعوذ بك من شر ما صنعت ابوء بنعمتك علي وابوء بذنبي فاغفر لي فأنه لايغفر الذنوب الا انت
* استغفر الله العظيم الذي لا اله الا هو الحي القيوم واتوب اليه
* اللهم اني ظلمت نفسي ظلما كثيرا ولايغفر الذنوب الا انت فاغفر لي مغفرة من عندك وارحمني انك انت الغفور الرحيم
* اللهم اغفر لي خطيئتي وجهلي واسرافي في امري وماانت اعلم به مني، اللهم اغفر لي جدي وهزلي وخطئ وعمدي وكل ذلك عندي ، اللهم اغفر لي ملقدمت وما تأخرت ومااسررت وما اعلنت وماانت اعلم به مني ، انت المقدم وانت المؤخر وانت علي كل شئ قدير
* اللهم اني استغفرك من كل ذنب تبت اليك منه ثم عدت فيه ، واستغفرك من كل ما وعدتك به من نفسي ثم لم اوف لك به ، واستغفرك من كل عمل اردت به وجهك الكريم فخالطني فيه غيرك ، واستغفرك من كل نعمه انعمت بها علي فااستعنت بها علي معصيتك ، واستغفرك ياعالم الغيب والشهادة من كل ذنب اتيته في ضياء النهار او سواد الليل في ملأ او خلاء او سرا او علانيه ياحليم
* استغفر الله العظيم الذي لا اله الا هو ، الحي القيوم غفار الذنوب ذا الجلال والاكرام واتوب اليه من جميعالمعاصي كلها والذنوب والاثام ، ومن كل ذنب اذنبته عمدا وخطأ ظاهر وباطنا قولا وفعلا في جميع حركاتي وسكناتي وخطراتي وانفاسي كلها دائما ابدا سرامدا ، من الذنب الذي اعلم ، ومن الذنب الذي لا اعلم ، عدد ما احاط به العلم واحصاه الكتاب وخطه القلم ، وعدد ماوجدته القدره وخصصته الاراده ومداد كلمات الله كما ينبغي لجلال وجه ربنا وجماله وكماله ، وكما يحب ربنا ويرضي
* اللهم اني حسناتي من عطائك وسيئاتي من قضائك ، فجدبما انعمت علي ماقضيت وامح ذلك ، جللت ان تطاع الا بأذنك او تعصي الا بعلمك ، اللهم ماعيناك حين عصيتك واستخفافا بحقك ولا استهانه بعذابك لكن لسابقة سبق بها علمك فالتوبه اليك والمغفره لديك ، الا اله الا انت سبحانك اني كنت من الظالمين استغفر الله العظيم الذي لا اله الا هو الحي القيوم واتوب اليه ، واسأله التوبه والمغفره انه هو التواب الرحيم
لي ولوالدي ولزوجي ولامة المصطفي صلي الله عليه وسلم

Monday, September 8, 2008

تاااااااج عن التدوين

اول حاجه بشكر صديقتي في التدوين مني علي التاج الجميل ده :)
نبدا بأه
بدأت تدون امتي ودخلت العالم ده ازاي ؟؟
بدأت ادون من سنه الا شهر واحد يوم 10/10/2007 ودخلت العالم ده عن طريق جوزتي فوكس هو كان عنده المدونه بتاعته وكان بيكتب عني فيها وكان بيبعتلي اللينك اقري اللي كاتبه بس كنت حتي مش عارفه ابعت كومنت علي اللي كاتبه وهو علمني ازاي ابعت الكومنت وانا دخلت وفهمت الموضوع وعملت المدونه من وراه عشان اعمله مفاجأه في عيد ميلاده اعمله موضوع واقوله فيه كل سنه وهو طيب وبس :)
كان انطباعك ايه في البدايه ؟؟
والله مش كنت عارفه هعمل ايه بعد كده ولا هكتب في ايه ولا مين اللي هيقرا وقتها كنت بكتب الموضوع وفوكس بس هو اللي بيبعتلي كومنت عليه وبس ومش كنت اعرف حد تاني وبصراحه مش كنت بستنا حد غيره وبس يعلق عندي لاني مش عارفه حد بس بدأت ادخل مدونات تانيه وفوكس يعرفني علي مدونات بتعجبه ونقري فيها ونعلق سوا فيها وهكذا بأه
مين اكتر واحد بتهتم بتعليقه علي بوستك الجديد ؟؟
حقيقي كل الناس اللي بتدخل تعلق عندي انا بستنا تعليقهم واولهم اللي اتعودت منه انه يكون الاول فوكس بس فعلا انا مش بشيل البوست غير لما اشوف تعليق كل اصاحبي المدونيني عليه وكمان بفرح جدا لما القي حد جديد عاجبه تفكير وعاجبه البوست برحب بيه جدا وقتها انه اول زياره :)
ايه اهم حاجه اتعلمتها من عالم التدوين ؟؟
اتعلمت اقول رئي بصراحه من غير اي تجميل او نقص منه
زمان قبل المدونه كنت بقعد اكتب اللي جوايا في ورقه ولو حاجه مش حلوه ومش حبه اقراها تاني بقطعها ولو حاجه كويسه بشلها وبعد كده بقيت بكتب في المدونه علي طووووووووووول اي حاجه كفايه يكون في ناس بتشركني في كل حاجه :)
ايه اكتر حاجه كرهتها ؟؟
والله هو الموضوع لذيذ مووووووووووت بس هي حاجه صغنونه كده احيانا بتيجي تعليقات من ناس مش عارفاهم اول مره يعني يدخلو والقيهم تعليقتهم مستفذه مش بتستفذني انا وربنا بتستفذ خطيبي يعني المفروض يراعو نقطه زي دي مش اكترمن كده انا عارفه والله وبيبان انهم كلهم ناس محترمه جدا جدا بس الغيره بأه لحسن وربنا انا عامله الاشراف ده لاني حسيت اني ممكن فوكس يجي يولع فيا وفي المدونه في يوم يكون حد بعت تعليق مش عاجبه بس :))
حاسه انه التدوين له تأثير ؟؟
ايون طبعا وتأثير جاااااااااامد جدا كفايه انه لما بتحصل اي حاجه حولينا بنقدر نجتمع علي كلمه واحد واحيانا كلمتنا دي بتوصل للي عاوزين نوصله صوتنا صح ولا ايه ؟؟؟
تهدي التاج ده لمين ؟؟
كل اللي اعرفهم مني اهدتهم التاج ده
مافيش غيررررررررر
فووكس (الكيت كات )معلش بأه ياحبيبي جت فيك انت :))
وبرضه اي حد عاوزه يتفضل ياخده المدونه مدونتكم كلكم :)

Saturday, August 30, 2008

عندي خبر حلو باركووولي

عندي اخبار حلووووه موووووووووت ياجماعه
يوم الجمعه الموافق 29/8/2008
تم عقد قران الباشمهندس فوكس علي الانسه اينو وعقبالكم كلكم يـــــــــــــــارب
هدعي الدعوه اللي دعتها قبل كده صديقتي في التدوين مني وانا اتعملتها منها وبقيت بدعيها دايما :)
اللهم استر عنه عيوبي واسترعني عيوبه واظهر محاسني واظهر محاسنه
ورضني بما رزقتني وبارك لي فيه
امين يـــــــــــــــــــــــــــــــــــــــــــارب العالمين
رمضان كريم علينا وعليكم
كل سنه وانتو طيبين

Wednesday, August 20, 2008

دوامه

انا بقيت في دوامه مش عارفه ارضي مين واسيب مين
ولا عارفه اكلم مين علي حساب مين
ولا عارفه مين معايا ومين مش معايا
ولاعارفه اصلح ناس زعلانين مني وانا مش عارفه سبب زعلهم مع اننا مش بنشوف بعض من زمان
ولا عارفه مين فرحنلي ومين عاوز ياخد فرحتي من قلبي
انا اليومين دول نفسي انسي كل حاجه وابقي اسعد مخلوقه في الدنيا لكن حتي دي ولا عارفه اعملها اه فرحانه لكن مش الفرحه اللي المفروض اي بنت مكاني تفرحها
يــــــــــــــــــــــــــــــــــــــــــــــــــــــــــــــــــــارب
فرج الكرب والهم من قلبي
واصلح الحال واهدني لما تحبه وترضاه
واهدي الحال يارب ياكريم

Sunday, August 10, 2008

اخيرا وبعد انتظااااااااااار !

تحديث سريع
نفسي تكون معايا اوووووووووي اوعي تبخل عليه بالسعاده دي :$
كمان تحديث ...ء
عدنا بسلامة الله الي ارض الوطن
========================
عندي اجازه وهسافر بكره لحبيبتي اسكندريه
وحشتني اوي كل حاجه بحب ازورها هناك
ووحشني منظر البحر وريحته
ووحشني سرحاني وانا قدامه
انا بستنا الاجازه دي بجد من السنه للسنه وعندي اي مكان في الدنيا حاجه واسكندريه حاجه تانيه وطعم تاني
اشوفك علي خير يامدونتي وكمان المدونيني اصحابي :)
هي اجازه صغيره مش كبيره بس عندي بالدنيا
سلالالالام

Sunday, August 3, 2008

زي النهارده اسرت قلبي برقتك :$:$:$

جايه احكي الحكايه حكاية اجمل قلبين قبلو بعض وكأنهم كانو يعرفو بعض
واول ماشفو بعض كملو بعض :$
زي النهارده من سنتين بالظبط قلبي عرف معاني كتيره اوووووووي
اول معني يعني ايه هي الحياه
يعني ايه قلب يحبك
يعني ايه قلب يخاف عليك
يعني ايه قلب مستعد يفديك حتي بعمره
يعني ايه قلب بيدور علي السعاده عشان يهديهالك
معاني اكتر من كده بكتيرررررررررر معاني مش بتتوصف لكن اكتر بتتحس
زي النهارده بدأنا حياتنا سوا وخططنا ليها سوا
وقررنا نفضل جمب بعض علي كل احوال الحياه
اليوم ده مش ميلاد قلبي بس لالا ده ميلاد ليه انا كمان بجد انا اتولدت في اليوم ده علي ايدك
بجد انا بشكرك علي كل حاجه حلوه عشتها معاك في السنتين دول
وبشكرك اكتر علي كل احساس جديد جوايا اتولد علي ايدك ياحبيبي
وكلمة شكر مش كفايه عليك وكلمة بحبك بقي اللي جوايا اكبر منها بكتيررررر
نفسي القي حاجه اقولهالك تكفيك حقك بس زي مابقولك كل مره انت اكيد حاسس بالي جوايا ليك اكيد عارف انه كبير اوي اكبر من انه يتوصف بمجرد كلمات
ربنا يخليك ليا يااجمل حبيب في الكون كله
ربنا يحفظك ليا يااااااااااااااااااااارب
ويكملنا فرحتنا علي خير ونحتفل باليوم ده السنه الجايا في بيتنا سوا :$
عاوزه اقولك مرسي اووووووي علي البوست الرقيقه اللي نزلتها عشاني النهارده بجد كانت مفاجأه تحفه :$
بـــــــــــــــــــــــــــــحـــــــــــــــــــــــــــــــــبـــــــــــــــــــــــــــــــــــــــك
ها بس :$:$:$:$

Friday, August 1, 2008

الشهر ده عيد ميلاد قلبي

في الشهر ده قلبي دق اول دقة حب :$

هقولكم الحكايه بالظبط في البوست الجاي

ب ح ب ك

ي ا

ف و ك س

:$:$

Sunday, July 27, 2008

بعد ان انتظر اهلي الضحايا القصاص :(

بتكلم عن العباره السلام 98 اللي هزت قلوب ناس كتيره اوي واللي سمع اللي كان في الصندوق الاسود وقت الغرق هيحس قد ايه المعاناه اللي الشهداء دول شافوها قبل مايموتو
وكان جزاء اللي تسببو في غراقها البرائه !!!
ازاي حرام عليكو دم المئات اللي راح هدر ده والاهالي كان اللي مصبر قلبهم قضاء عادل يجبلهم حقهم
وفي الاخر برررررررررررائه لكل المتهمين ومن ضمنهم صاحب العباره وابنه
معادا واحد حكمو عليه بستت اشهر ولي ايقاف تنفيذ الحكم يجب دفع غرامه عشرة الاف جنيه :(
كفايه بس منظر اهلي الضحايا لما اصابتهم الهستريا مما كانو لم يتوقعوه من الحكم حاجه تحزن والله
هو ده العدل ؟؟
مش عارفه بس انا حاسه بأحباط شديد مش مخليني عارفه اكتب اكتر من كده
ربي لا اسألك رد القضاء ولكني اسألك اللطف فيه :(
ربنا يصبر قلوب الناس الغلابه دي ويجعل مسوي كل من مات علي العباره دي الجنه ان شاء الله

Wednesday, July 23, 2008

ليييييييييه بتعملو فينا كده ؟؟؟؟؟؟؟؟



تحديث ...
عاوزه اقول اني الميه فضلت مقطوعه عن تلت مناطق محيطين ببعض لمدة 4 ايام متواصله نتيجة كسر مسورتين رئيسيتن للمناطق دول
الحمد لله رجعت بعد طول المعاناه في الفنره دي
=======================================

انا عارفه اني العنوان يخض بالنسبه للمدونه بتاعتي

بس خلاص انا علي اخري

حصل كام حاجه اليومين اللي فاتو دول يخلو الاخرس ينطق !!!

الاول النور يقطع ويفضل قاطع لمدة 30 ساعه متواصله لحد لما حسيت اني جالي تخلف من كتر القاعده من غير كهربا ولا وسائل التكنولوبيا والموبيل فصل شحن ومش انا بس دي كل موبيلات اخواتي وماما وبابا يعني انفصلنا عن العالم

ونتصل بالشركه ياخدو البلاغ ويعملوه قرطاس ويطيرو من الشباك

ولا الهوا المنطقه كلها مقطوع عنها النور وهما كل لما حد يكلمهم يقولولو ولا نعرف ولا حد بلغ ويبقا اللي بلغ قبل كده قاعد جنب اللي بيبلغ

لكن هنقول ايه بأه يمكن بينسو !!!

ومش جه النور غير امبارح بعد العصر لما الناس تكتفو ولمو فلوس وصلحو النور علي حسبهم !!!

الجديد بأه واللي يغيظ اكتر يجي النور تقطع الميه

عااااااااااااااااااااااااااااااااااااااااااااا

هو ده اللي حصل بالظبط النور جه من هنا والميه قطعت :(

من امبارح بعد العصر برضه

والناس الميه اللي في بيوتها خلصت وطلعت قاطعه في المنطقه وكل المناطق اللي حوليها يعني مش منطقتنا بس

وفي عربيات ميه بتيجي مش الشركه بس الجدع يقرب نحيتها زحمممممممه موووووووووووووووووت

اللي عاوز يملا ازازه بس ممكن يقف اكتر من ساعه وياما يملاها ياما تخلص الميه ويرجع يامولاي كان خلقتني :(

طيب مية الشرب واشترينا ميه نشربها

طيب وبقيت الحاجات يعني ؟؟؟؟؟؟؟؟؟؟؟؟

اما هطق من جنابي عاوزه حل

وعاوزه اعرف هما بيعملو فينا كده ليه

يكنوش عاوزين يحطو ايدهم علي بيوتنا بوضع اليد عشان كده بيطفشونا منها

اوووووووووووف بأه

Thursday, June 26, 2008

تـلـك هـي دقــــات الـحـنـيـن

كل منا يشعر بالحنين للطفولة .. للحب .. للصداقة ......ه
وفي كل وقت حــنــيــن
عندما تتذكر الطفولة وايامها
تشعر بدقات الحنين
عندما تتذكر سنوات الدراسه واصدقائها
تشعر بدقات الحنين
عندما تفكر في الحب وتحن وتشتاق لاول كلمة حب قيلة لك واحسست بها
تشعر بدقات الحنين
عندما تتذكر اول زهره اهداها لك الحبيب وجفت لما مره عليها من الزمن وتتذكر فرحتك بها واهتمامك بها وقتها
تشعر بدقات الحنين
عندما تتذكر تلك الصخره التي تجلس عندها علي شاطئ البحر ويبحر ذهنك مع من تحب ووقتها
تشعر بدقات الحنين
عندما تشعر بالحنين يغمرك الي تلك الكلمات الرقيقه التي قيلة لك من من تحب والتي كلما افتقدتها حنيت اليها وقرائتها
تشعر بدقات الحنين
وتشعر ايضا وقتها انك تلك الطائر الذي يدلله نسمات الربيع وهو طائر بين دفء اغصانه !!
Eno



Thursday, June 19, 2008

هيييييييييييييه هعمل الواجب



فوكس ياجماعه بعتلي واااااااجب وانا مقدرش مش اعمله اصله واجب غالي اووووووووووي


السؤال الاول : اذكري اسم من طلب منك حل الواجب

الاجابه : فوكس خطيبي


السؤال التاني : اذكري القوانين المتعلقه بهذا الواجب

هكتب كل حاجه اهو

السؤال الثالث : تحدث عن ستة اسرار لايكتشفها من يقابلك للمره الاولي

الاجابه صعبه اوي عشان قولت قبل كده مش بعرف اقول حاجه عني بس هفكر كده واحاول

ـــ بحب الهدوء جدااااااااااااااااااااااااااااا


ـــ بغير علي اللي بحبهم جدا جدا جدااااااااااااااااااااااا( وش مكسوف ) لكن مش بيبان عليه الا قليل ومش بيفهمني الا اللي يعرفني كويس . صح يافوكس ( وش بيغمز ) ؟؟


ـــ رومانسيه جداااااااااااااااا وبحب كل ما يتعلق بالرومانسيه من اغاني واشعار وجو هادي رومانسي كده يعني :$:$


ـــ بحب الاطفال اوووووووووووووووووي بحسهم ملايكه كده وفي بيني وبينهم عمار جامد يعني بس والنبي ( محدش يقول لي فوكس الكلام ده )ه لحسن دي فيها مذبحه


ـــ عصابيه احيانا لكن مش بيبان عليه لاني بحوط جوايا واسكت


ـــ انطوائيه جدا لدرجه انه في ناس لما شافوني لاول مره افتكرو هدوئي وانطوائيتي غرور لكن والله انا مش كده كل الموضوع اني هاديه وانطوائيه لكن بحب الناس جدا جدااااااااااااااااااااا


السؤال الرابع : حول هذا الواجب الي ستة مدونين واذكر اسمائهم مع روابط مدونتهم








وبعت للكل عشان يجي بسرعه ياخد الواجب

مرسي اووووووووووي يافوكس علي الواجب يارررررررب اكون شاطره وحليته صح :))

Saturday, June 14, 2008

الــــحــــب الاول



هو اول بذره تلقي في القلب وتطرح حبا وحنانا وعطاء بلا نهايه
هو اول زهره تتفتح في بستان القلب
هو اول مشاعر حقيقيه تجري في نهر القلب ويتفجر منها كل عيون للحياه
==========
هذه اول خاطره اكتبها عن الحب الاول
الحب الاول موضوع حلو اوووووووي واحساس حلو اكتر اننا نحتفظ بالحب الاول واحنا لينا كل الفخر اننا الحد اللي
هنكمل معه حياتنا هو في الاصل حبنا الاول
اول حب
مشوفتش حاجه بتنسي سنين العمر قبل لقاك
وشوفت عنيك نسيت نفسي بقيت عايش عشان اهواك
ماحستش اني ليه حياه بجد الا لما حبيتك
حبيبي انت اللي بتمناه ومصدقت اني انا لقيتك
واقولك بس ايه تاني ده صعب اوصف هواك بكلام
يااول حب خلاني احس بمعني للايام
هتلاقي عيوني زيك فين يااغلي ماليا في الدنيا
شيلك جوه قلبي حنين وشوقي تحسه في عنيه
اغنية اول حب مش فاكره مين بيغني بس بحبها :)
استوحيت موضوعي من موضوع حبي الاول للدكتور نوسه
تحياتي الي من هو الحب الاول في حياتي :$

Sunday, June 1, 2008

بـــعـــض مــعــانــي الحـــــــب

الــــحـــــب
عطاء من الرحمن ممدود ،وفي القلوب مولود
يفني الخلق ويبقا الحب موجود
الــــحــــب
تألف الاروح قبل لقائها ،وامتزاج القلوب رغم خلافها ، وقرة العين رغم بعدها
الــــحــــب
هو ان تري كل ماحولك جميل ، وان تكون لك ذكره معه بعد الرحيل ، وان يكون المحبوب لك دليل
حين تتحدث العين في نظراتها وتعبر الكلمات في صمتها وتحتويك المشاعر بأمواجها فهذا هو الحب
قلب رق بعد قسوته ، وعين بكت بعد صلابتها ، ونور تلقلق في حياته بعد ظلمته . انه المحب
الــــحــــب
نور ونار
نور ... في القرب يهدينا
ونار ... في البعد تكوينا
وبين كلاهما مذاق حلو يروينا !!!
الــــحــــب
هو داء القلوب ودوائها ، ومن لم يصاب به حرم من الدنيا جناتها
اذا عجز اللسان عن الكلام وحار القلم في البيان
وصار الامي حكيم اللسان فنحن امام حالة حب
الــــحــــب
سر مكنون احار قلوب العشاق ، واجهد اقلام الشعراء ، فسار جمال الحب انه مكنون ولو اكتشف الينا لذهب جماله
الــــحــــب
جنون ، فأن انت تهوي انت مجنون ، واجمل جنون جنون الحب
الــــحــــب
قناص لايخطئ مرماه يوما
الــــحــــب
قرصان القلوب ونهواه ، سهم احيانا جارح فينا ونلقاه ، زائر بغير استأذان ولا نأباه
الــــحــــب
توارد افكار ، وترابط اقدار ، وامتزاج اغيار
الـــــحـــــب
حرفين
الحاء ... حـــــــــيـــــــاه
والباء ... بــــــــقــــــــاء
ولكم مني كل الـــــحــــــب :)
:)اهــداء الـي مــن عــلــمــنــي الــــحــــب

Monday, May 26, 2008

أنــــــــواع الــــقــــلــــوب



قلب طيب ... يمسح خطايا الاخرين بكل سهوله ويرا ان الدنيا اكبر من كلمه ويحاول قدر استطاعته ترك بسمه نقيه علي وجهه حتي لاتلمح بقية العيون كمية الطعنات التي تلقها بسبب كرم اخلاقه ... وشر الاخرين !!!

قلب جائع ... يفتقد الحب والحنان . ويبحث عنهم في كل مكان سواء في قصص الحب العابره او في احاديث هذا الزمان .ولايقنع بذرات الحب القليله . فهو متعطش الي حد الارتواء ومندفع الي حافة الاغواء

قلب محترق ... ملتاع علي طول البعد عن الوطن والاحباب لايكاد يبني في نفسه ادوار جديده من الحياه حتي تتكسر مجاديفه بفعل قسوة الواقع وتلاطم الذكريات فيبقا في مكانه . ذو احلام مستقبليه كثيره . ولكن ذو لذه ماضيه وشوق قديم اكثر

قلب يائس ... انتحرت فيه الاماني ، وضاعت منه الاحلام لانه فقد الدرب الصحيح لشاطئ الامان ،وابتعد كثيرا عن ملامح العمران بسبب طيشه فخسر نفسه واهله وجماعته ، ولم يبقا هناك مجالا للتسامح معه او حتي للغفران

قلب محب ... يملك في قاموسه أبجديه خاصه عجزت عن كتابتها كل الاقلام ، وحارت في معانيها كل الانفس والاذهان، به من المشاعر لاحياء كل النفوس الجامدة ، وما يغرق كل المدن الميته ، وله من المعجابين مالايعد ولا يحصي ،لانه يمدهم بكل ايثار بعضا مما عندهم ويعطيهم جزا مما احتواه .

قلب احمق ... لايعي مايدور حوله ، ولا يعترف بأخطائه فكل همه الاستمتاع بما يدور في محيطه ، واخذ كل مايستطيعه حتي ولو كان ذلم بوسائل غبيه تحطم انقي الانفس ، وتقتل اعظم الاشخاص

قلب مسافر ... لايقبع في مكان واحد وليس له انتماء لاي شئ فكل مايراه يكون تحصيل حاصل ومتعه للعين فقط ولا تربطه بالواقع اي صلة ويشعر بالغربه كلما حاول الارتماء في حضن الطبيعه او كلما حاول ذرف الدموع علي بعض مايصيبه لانه ببساطه لايملك من يقف بجانبه ويواسيه علي ماهو فيه

قلب جارح ... يلقي من الكلمات مايخدش كل ماهو جميل وله من التصرفات مايؤلم كل من به محيط ولا يشعر بلذه الا بعد انا يمارس سلطته العليا دون الانتباه الي ان مايفعله يجعل احبابه حطاما لايقدرون علي التفاعل او حتي الابتسام

قلب مظلوم ... عاني من تقاليد المجتمع ونظراته المجحفه ماجعله فأرا يخاف من مواجهة الخيال لديه طاقة كبيره واحلام كثيره كانت من الممكن ان تحدث تغيرا في معالم طريقه ولكنها وللاسف ! ظلت محبوسه بين مطرقة الخجل وسندان الاهل!

قلب ميت ... لايشعر بأي شئ فكل مايراه سواد في سواد وكل مايحلم به ان يأكل وينام دون الولوج في بقية الاحداث اليوميه الجميله التي تشغل بال الناس والاذكي من هذا كله انه يحاول بسط نفوذه علي كل الانام ويمشي لتحقيق ذلك بأقدام حديديه علي الورود الحمراء دون اي ندم او حتي الالتفات لتقديم الاعذار

قلب مؤمن ... قانع بقضاء الله وقدره وصابر علي البلاء وحامد وشاكر للنعم الكثيره التي منحها الله له صامد في وجه التحديات التي يجد نفسه فيها ومحاولا بكل مايستطيع غرس بذرة الخير في طريقه والمحافظه علي نفسه وجوارحه

مــــــــنــــــــقــــــــول

Monday, May 12, 2008

حكاية العصفوره 2



اسفه جدا علي التأخير بس والله مشاغل الحياه هما بيقولو كده برضه :))

زي ماكلنا عرفنا في الاول عن حدوته العصفوره

لقيت الناس زعلت انها اتنازلت عن حريتها

كان غصب عنها كانت بجد مش عارفه اخر الطريق ده فين يعني هي اعتبرت التنازل مسكن كده مؤقت :(

ونكمل بأه ...

فاتت ايام وعدت علي العصفوره والحال نفس الحال

كان كل اللي بيسعدها عصفورها

وبدل ماكانت هي بتخرج وتطير بقيت تشوف الدنيا من خلاله هو ومن نظرته هو

وقد ايه كانت العصفوره واثقه فيه وفي نظرته للدنيا والحياه وكمان بتاخد بيها
وراحت حريتها وسط زحام حياتها وهي بتطالب بيها لكن خلاويص اللي بيروح مش بيرجع . ومش كان في تفكير العصفوره غير انها تخطط صح للمستقبل اللي جاي اللي راح خلاويص مافيش فايده منه واقتنعت جدا انه (لافائده من البكاء علي اللبن المسكوب ) وعدت علي العصفوره لحظات كتيره فيها يأس وفقدان ثقه من كل اللي حواليها من العصافير وعدت عليها كتير لحظات ضعف اتمنيت فيها انتهاء حياتها لكن بسرعه كانت بترجع اقوي لما تبص علي المستقبل

بس العصفوره اكيد استفادت كتيرمن كل اللي عدي عليها وعلي قد ماكان بيضعفها وقت الاذمه

الا اني كل حاجه عدت عليها قوتها اكتر وزودت تحملها واتعلمت كتير اوووووووووووووي في فتره بسيطه اووووووووووووي

واتعلمت معني الحريه ايه ومعني التنازل ايه ومعني الانكسار ايه ومعني الوحده ايه قبلها مش كانت بتعرف كل الحاجات دي

اتعلمت ازاي لما تقف في موقف من الحياه تكون قده

وبتحاول تتعلم ازاي تتغلب علي لحظات اليأس والضعف وبتحاول توصل لعصفورها انه هو كمان مش ينفع انه اليأس والملل يغلبه ويكون زي مااتعودت اقوي من اي ملل لانه هو دلوقتي بدل جناحتها هو بقي شبكها علي الحياه يعني لو شبكها ده كمان قفله الملل واليأس العصفوره هتموت بجد .

والعصفوره أتأقلمت خلاويص علي حياتها دي واللي مصبرها انها حياه مؤقته لحد لما تروح عشها هي اللي بجد بتحلم بيه وبتحلم تخليه حته من الجنه لي عصفورها وبتحلم انه يكون قائم اولا علي طاعة الله عشان ربنا يبارك لها فيه

وبس وتعيش في تبات ونبات وتجيب عصفورات

صغنانين تحافظ عليهم وتعلمهم

كل اللي اتعلمته


وتوتا توتا خلصت الحدوته :)

يارب تكون عجبتكم واسفه انا اسلوبي علي قدي يعني مش اسلوب ادبي ولا حاجه

مرسي اووووي لاهتمامكم بالكتابه :)