Sunday, September 13, 2009

استناني جايلك و هتشوف هعمل فيك إيه..بس اصبر علية..حوار مع؟؟‏

منقو و و ل من احد المنتديات

ΏΏΏΏΏΏΏΏΏΏΏΏΏΏΏΏΏΏΏΏΏΏΏΏ

فلان الفلاني بيقووول:

دأنا هبهدلك وهاوديك فى داهيه بس اصبر عليا بس !!!!!!!
استنانى انا جايلك وهتشوف هعمل فيك ايه فاهمنى انت , اكيد مش فاهم ,بس انا هخليك زى العربيه بعد اما تنضف فى البنزينه هوسخها بالطينه ,
وهعرفك شغلك كويس عشان تعيش الدور كويس وتعملى انك جامد اوك ياصاحبى استنى عليا بس .

لازم اعرفكم قبل ماحد يفرح بنفسه ويفتكر ان هو خلاص بقى جامد لما صلى كام ركعة تراويح , أو فتح المصحف وختمله ختمه ولا اتنين , وانت فاكر نفسك انك بقى لما صليت تهجد بقيت الشاب اللى مافيش زيه , وعمال تنزل توزع بلح ووجبات وتعمل خير كأن الخير مستنيك انت بقى عشان تعمله , ها ها ها ها ها لا وايه مش عايز تغتاب وبتغض بصرك ياسلام على الايمان , فرحان برمضان اوى انت ها؟ , طب ياحبيبى افرح زى مانت عايز براحتك وافرح على قد ماتقدر حقك ماهو عشان انا بعيد عنك بس.

بس انا مش زيك بقى انا عندى هدف ورساله فى حياتى وبموت نفسى عشان احقق هدفى ده ومش هوائى زيك اشتغل حبه وانام حبتين , أنت عندك هدف فى حياتك ؟؟ ياترى بقى بتعمل ايه عشان هدفك ده وياترى شغال 24 ساعه زى مانا شغال اكيد لا عارف ليه ..... ولا بلاش لأحسن تزعل .
انا بسيبك تفرح كام يوم وببعد عنك غصب عنى طبعا انا نفسى افضل جنبك و برجعلك تانى وانسيك اللى انت عملته وبكمل معاك بقيت السنه زى مانا عايز عشان احقق هدفى وبجتهد على قد ماقدر , معلش سامحنى اذا كنت بعرفك حقيقتك اللى انت مش قادر تغيرها وبتفضل كده . وطبعا الكلام ده مش لحبايبى اللى مش بينسونى ابدا ومقضينها مسلسلات كلها مناظر او نوم ومكبر دماغه ربنا يخليكوا ليا مريحنى دايما كده .


خليت عقلك الباطن متعود على انه بعد رمضان يتحرر من عبادته والقيود اللى كانت مسكاه عن الدنيا ويوم 30 ده الليله الجامده بقى اللى تقضى فيها فرحة العيد ويلا ياعم مش اشتغلت 29 يوم براحتك لازم تروح عن نفسك وتعيش حياتك بس زى منا عايز زى ما اتفقنا .


تصدق انك زى المجنون اللى بينزل يصلح عربيته ويزودها بكل الكماليات ويرشها دوكو وينظفها وتاخد منه شهر كامل قاعد جنبها وقبل مايركبها بعد مانضفت عشان يمشى بيها يروح جى مكسر فيها وخارم الكوتش ويرمى عليها طينه .... هااهاهاهاها بتضحك صح ماهو ده إنت ياخفيف بس إنت مش واخد بالك .


بس بدل العربيه بيبقى قلبك , والشهر اللى قعدت تصلحه فيه ده رمضان , والتكسير والبهدله ديه هديه منى ليك فى ليلة العيد احلى معاصى عديتك ياحبيبى ورينى هتمشى بالعربيه ازاى بقيت السنه قصدى قلبك ده بعد مالوثته تانى هتكمل بيه ازاى هههههههههه أظن كده عرفتونووونى سلااااااااااام .......
........

يرد عليه بئى اخونا الإنسان الي بيحسبه هو غلبان:

استنـــى عنــدك !!!!!

ايه ياعم انت مالك كده عامل نفسك انك قوى وانت ضعيف جدا ونافش ريشك على الناس فى المنتدى , أنا معاك ان كلامك ده صح وبيحصل لناس كتير اوى بس ده قبل ماتقولهم بغبائك على اللى انت بتعمله فيهم , دلوقتتى انت بدل ماتسخر منا فوقتنا وصحيتنا , طبعا زى مانت قلت ان عندك هدف ورساله وهو إنك تدخلنا النار وتودينا فى داهيه وتملى حياتنا بالكرب , وفعلا أنت بتشتغل علطول علينا وبتعمل كل اللى فى مقدرتك , بس إحنا كمان عندنا رسالة أغلى وأسمى بكتير منك وهى الجنة وأننا نبقى مع الله ورسوله وفعلا إحنا ساعات بنغفل وبيضيع مننا وقت وبتستغل أنت الفرصه ديه إنك توقعنا فى الغلط , لأنى إذا ماشتغلتش لهدفى ورسالتى للأسف هبقى فى اللحظه ديه شغال فى رسالتك وهدفك .
وصدقنى أنا هعيش حياتى بعد كده زى مأنا عايز لهدفى ورسالتى مش زى مأنت عايز , والعاده اللى خلتنى اتعود عليها وبتقول مش قادر اغيرها وهو انى بقع بعد رمضان علطول , خلاص هتتغير وهأقدر أوريك أنا هعمل إيه وعشان أبقى صريح أنا كمان وعشان عارف إنك ضعيف ,

1- أنا بقى معايا صحبه صالحه هتمسك بيها وهافضل طول الوقت معاها وعشان أنت ضعيف لما بتلاقينا كتير ومش هتعرف تتشطر عليا , صحبه تخلينى علطول قبل ماهقع تمد ايديها وتسندنى وتخلينى اقف تانى , ودايما وخدانى معاها فى عمل الخير واللى فى مصلحتى دنيا واخره, نضحك وننتعلم وناخد كورسات ونتعبد ونعمل خير ونخرج وكل شىء ينمينا يقوينا .

وكمان 2- القرآن اللى كنت بفتحه فى رمضان مش هيتقفل تانى خلاص لأنى نويت انى افهمه واعيش معاه واعرف ربنا عايز منى ايه وبيحبنى أد ايه وهخلى ليا وقت ثابت أقرا القرآن واعرف معانيه وأدور فيه على صفات المؤمنين واكتبها واسعى ان اوصلها وأدور على صفات الجنه واحبها واسعى ليها وأدور وأدور ...., أستنى مالك بدأت تخاف كده.


لسه تالت حاجه 3- الذكر واخد بالك معايا طبعا عارف الذكر أنت , اللى بيخليك تجرى وتستخبى ومتقدرش تقرب منى , من دلوقتى ولحد اخر يوم فى عمرى اذا كنت تعبان ومش قادر اعمل اى طاعه لسانى وأنا قاعد وأنا ماشى وكمان وأنا بنام مش هيبطل ذكر وفى كل لحظه ربنا هيفضل فى بالى وفى قلبى لأن الذكر ده تطهير لقلبى كل شويه كده .


4-أنا فى رمضان عرفت حلاوة المسجد وعرفت أد ايه أنا كنت بعيد عن كرم ربنا وإنى أروح بيته عشان يستضفنى فيه بكرمه وثوابه ومغفرته ومش هاسيب صلاة الجماعه أبدا وبالذات صلاة الفجر , اللى أنت ياما خلتنى أنام عنها وكنت تقف تضحك وتفرح على راسى وأنا نايم , من النهارده هزيد النور فى طريقى لما امشى فى الظلمه لربنا وكل الناس نايمين ,


أستنى بقولك أنا خلاص فقت ومش هابقى هوائى زى مانت قلت أسمع ديه كمان اللى هتقضى عليك بجد 5- وهو إنك تلاقينى قايم بليل بفرش السجاده وبقف بين أيدين ربنا لوحدى أنا وهو بس وبصلى وبدعيله وهو بيستجيب ليا وبيغفرلى وأنت واقف بتصرخ , أيوه أنا عندى كرامة وعزة وشرف المؤمن فى قيام الليل ودعائى لربنا إنه يثبتنى دايما على طاعته لأن كمان الدعاء سلاح المؤمن اللى لازم يفضل رفعه عليك دايما.

ها تحب أكمل ولا كفايه عليك كده , متعيطش أنا لسه هخليك تنتحر لما تلاقينى ثابت على الخمس حاجات دول ومش عارف تعمل معايا أى حاجه وساعتها هنشوف مين اللى هيضحك من التانى وهنشوف مين هيوصل لهدفه لأن ملهاش حل يإما أنت تدخلنى النار يإما أنا أدخل الجنه , زمان كنت فاكر الموضوع صعب وكنت بنهزم بسرعه , لكن بجد كلامك فوقنى خلاص , واستحاله رمضان يدخل عليا ويخلص وارجع تانى لنفس ذنوبى ونفس حياتى اللى كانت من غير هدف قبل كده ,,انســـــــى.

الشيطان:
كفاااااااااااااااايه ارجووووووك كفاااااايه أنا كده مش هعرف أكل عيش بقيت السنه , أشوف فيك يوم تكون مذلول فيه ليا وعمال تعصى اااااه .

الإنسان:
ههههههه العيش اللى عايز تاكله ده مش هتاكله على حسابى انما روح للى عايز يفضل طول عمره معندوش هدف وماشى معاك فى هدفك وهيلاقى نفسه خسر كل شىء , بالنسبالى انا هابقى مذلول فعلا بس للخلقنى وللى بيأكلنى ويشربنى وبينعم عليا بكل شىء للرحيم للتواب لاجمل شىء وهو ربى لأنه يستحق أوى لأنه يستحق أوى لأنه يستحق أوى.
ــــــــــــــــــــــــــ
ــــ
تم حرق الشيطان اكتر ماهو محروق لأنه ضعيف جدا بس لما لقى قصاده واحد قوى وثابت مقدرش يعمل حاجه , وممكن يرجع تانى وتالت بس برده مش هيعرف يعمل حاجه والحياه مستمره
ياهدفه ياهدفنا

9 comments:

شمس النهار said...

الحوار جميل جدا ومنطقي وهو ده اللي اعتقد بيحصل

وفعلا في ناس اول مابيعلن ان بكره العيد بيعملوا حاجات غريبه جدا

ولما تسأليهم يقولوا مش خلاص رمضان خلص

ربنا يجيرنا من شر النفس والشيطان

حروف said...

اول تعليق

حروف said...

امممممممم اية دة شكلي مش حطلع اول تعليق
هو انا قلتلك كل سنة وانتي طيبة؟؟؟؟؟؟؟؟؟؟؟؟؟

كل سنة وانتي طيبة
دمتي بالف خير وحب

mimi said...

ماشاء الله علي اختيارك

بجد حلو البوست ويارب يارب تقدرنا علي الطاعة

شكرااااااا

شمس النهار said...

كل سنه وانت طيبه
وكل سنه وفوكس طيب

ان شاء الله السنه الجايه في بيتكم فرحانين بيكم


عيد سعيد

Eno said...

شمس النهار

الحوار فعلا عجبني جدا لما قريته ياشموسه

وهو ده تقريبا اللي بيحصل

نورتيني بجد في اول تعليق:)

Eno said...

حروف ...

معلش اوت المره دي مش اول تعليق بس التاني :)

وانتي طيبه وبالف خير ياقمر :)

دمتي بكل ود :)

Eno said...

mimi ...

ازيك ياميمي :)

الحمد لله اني البوست عجبك والله :)

نورتيني بجد :)

Eno said...

شموسه ...

وانت طيبه وبالف خير مرسي اوي علي الدعوه الجميله دي ومش تحرمينا من دعواتك دي محتجنها اوي والله :)

بجد دايما منوره البلوج هنا:)