عامل النظافه اللي مش ( زبا....)ه

حكايته ايه بأه الراجل ده بقاله فتره كده بيعدي مرتين في الاسبوع يكنس الشارع كله مش يخلي في فتله كده في الارض
واي حد عنده اكياس قمامه بيخدها

ومش ليه اي طلبات اللي فيه النصيب هو بيرضا بيه جدا

واحده من الجيران بتنده علي ابنها بتقوله (الزب...) جه اديله القمامه

راح قالها ياست انا مش (......) انا عامل نظافه

قالتله وايه الفرق قالها الفرق اني اشتغلت الشغل ده غصب عني عشان الظروف

لكن انا اصلا ((فوعلي)) من اللي بيشيلو طوب واسمنت عند البناء

لكن وقت الازمه مافيش حد بيبني وبفضل قاعد طول النهار عند المحطه انا وزميلي لحد بليل

مستنين حد يجي ينده لينا عشان نشتغل ومافيش وانا راجل صاحب ولاد اخدت ادواتي اللي هي ( الجروف والعربيه اللي بيشيلو فيه الاسمنت والمقطف ونزلت ادور علي اي حاجه اعملها ومش لقيت غير اني اخبط علي البيوت واخد القمامه اللي عندهم وانضف امام منزلهم مقابل اي شئ يدفعوه )

ابقي كده (زب...) برضه ؟؟؟؟

انا كنت واقفه في الشباك وسمعت الحديث صعب عليه اووي بجد


لانه رغم ماقاله الا وبيستحمل قلة زوق الناس معاه وهي بتحدفله الاكياس من الادوار العليه في الشارع
وهو بيلمها من سكات وياخد فلوسه ويمشي

اما بأه عامل النظافه اللي هو (((زبــا....)))من عند الحكومه بينده مره واحده في الشارع كله
وعلي الناس ماتخرج يكون هو في ثواني في اخر الشارع ومركب عجل في رجله

واللي يشتكيه يقول انا باجي بس الناس مش بترد عليه وافضل انده انده ولا حد يعبرني الا ناس قليله

ايه الدنيا القاسيه دي ؟؟؟؟
ربنا يساعد كل محتاج يارب ويبعتله الرزق الحلال
بتمنا ياجماعه بجد نحاول نعامل الناس اللي زي كده بشوية احساس
لانهم بشر لحم ودم وعندهم عزة نفس زي اي حد