Tuesday, October 30, 2007

فودافون بتهيس علي الكل :(




امبارح فودافون فصلت شبكه 6 ساعات لحد الساعه 1.30 بجد تهيس


اللي سمعته بقا انه سبب سقوط الشبكه امبارح هو قرب الشبكات من بعضها

يعني من كتر ما فودافون بتزرع شبكات قصرت علي بعضها ووقعت الشبكه

يعني جم يكحلوها عموها ههههههههههههههههههههه


وطبعا انا مش داخل دماغي الكلام ده لاني اصلا المفروض اني في المجموعه بتاعت فودافون دي مهندسين اتصالات وشبكات وده اختصاصهم مش ممكن يعني مش هيعرفو اني كتر الشبكات هيسقط الشبكه ولا لالالا


المهم انها كانت مهزله بجد لما شبكه باكملها تقع لمدة 6 ساعات


ولما نيجي نقول خلاويص هنرمي الفودافون ونشترك في شركه جديده نرجع نسمع انه بيظبطوالدنيا وانه مش هيحصل تاني لكن واضح انه كله كلام تثبيت وبس

والفتره الاخيره الشبكه كل مادا وبتسوء وبتخرب اكتر والعملاء اللي انا منهم قرفانين اخر قرف ونفسهم يلاقو حل



ده غير طبعا ل لما تنزل تحول رصيد ولا تشتري كارت بتوع المحلات وهما مش عاتقين فروة الشركه تقطيع وبهدله من اللي الشركه بتعمله طبعا فيهم مش مجانيني هما يعني اكيد ليهم حق مش الكل هيفتري مره واحده كده


كل حاجه كوم بقا واللي جاي كوم تاني انك تحول رصيد لحد من تليفونك ومتأكد من الرقم مليون الميه وبعدين تسال وصل ولا لالا يقولك ولا شوفت حاجه مافيش حاجه جت ياعيني اتكعبل ووقع في الطريق واتبعتر !!!!! او ممكن يكون ركب موصلات فا الرصيد صرف نفسه في الموصلات وبالتالي موصلشي حاجه اصلي الموصلات علينا مش عليهم


وبعد كل ده تتصل بخدمة العملاء اللي هي المفروض في خدمة العملاء وميرضوش !!!!! طيب اعمل اييييييه ؟؟؟؟؟؟

اللي مستغرباله اني الشركه دي كانت من أوأل شركات الاتصالات في مستوي الخدمه وكل حاجه

ايه السبب اللي خلي مستوي خدمتها ينحدر بالشكل ده ؟؟؟؟


هــــــو ده الـــســــؤال !!!؟؟؟؟؟


يـــــــــــــــــــــــــــــارب يافودافون يوعدك ببطه سوده تخلععلك كل الشبكات الزياده اللي عندك

يــــــــــــــــــــــــــــــــــــــــــــــارب بس ها

انا بهدي النفوس بس علي فكره :)

Monday, October 29, 2007

لينا شماميان

وانا بقلب في صفحات النت كده الاسم ده اتكرر كتيررر قدامي وتحتيه ميديا كده قولت اجرب واسمع مع اني بخاف من التجارب اللي علي فجأه دي بالذات في الحاجات اللي بتتسمع من اللي ببقيت بسمعه الفتره الاخيره تلاقي حاجات غريبه بتتقال تحس اني الغناء تحول من ساحه فنيه الي جبلالية قرود سوري يعني
جزفت وفتحت الميديا وسمعت. ياماشاء الله علي الصوت حسيت صوت ملاك بجد مع الموسيقا ياااااااااااااااه بقالي كتير مش سمعت حاجه راقيه كده حاجه كده ميكس من فيروز ممكن
والموسيقا فكرتني كتير بروائع عمر خيرت
حاجه راقيه بمعني الكلمه، صممت ادورعلي البومتها وفعلا لقيت ليها نزل2 البوم عرفت اجيب واحد بس للاسف
الاخير ليها
كولكشن اغاني رائع صوت ملائكي موسيقا عذبه بجد حاجه خيال
لينا شماميان : سوريه من اصل ارمني، وبدات الغناء من سن الخامسه في حفلات وانتسبت للمعهد العالي للموسيقا بعد تخرجها من كلية الاقتصاد ، وهي مهتمه بانواع الغناء الكلاسيكي
البومها الاخير يتضمن تسع اغنيات
يما لالا _ دعوني اجود _ سحر _ يامسافره _ شام _حول ياغنام _قبل العشا_ بالي معاك _ ساريرهوفين ميرنيم
والاخيره دي اغنيه من التراث الارمني تتحدث عن الفراق حين يسيطر الالم علي الاحساس الذي يتوقف عن التجدد منذ رحيل الحبيب
وقد اهدت هذه الاغنيه الي كل العاشقين الذين حرمتهم ظروف الحياه من احياء هذا العشق
الالبوم كله تحفه بس اكتر حاجات عجبتني فيه
بالي معاك _ شام _ يامسافره
لتحميل الالبوم من اللينك ده
اتمني انه يعجبكم :)

Tuesday, October 23, 2007

كــل ســنــه وانـت طــيــب

النهارده عيد ميلاد حبيبي انت سألتني كتير عن سبب اني ليه عملت مدونه
والسبب هو اليوم ده مش يليق بيك ياحبيبي غير اني اعملك مدونه خاصه بيك اهنيك بيها في عيد ميلادك
اللي هو عيد ميلاد روحي
وكان نفسي اعملها بأسمك لكن انا عملتها بأسم صفه مميزه فيك :)
كل سنه وانت حبيبي
وعقبال يارب الف سنه واحنا سوا :)
هناكل التورتا سوا بقا اوعي تكلها لوحدك
العصفوره هتقولي
هههههههههههههه

Friday, October 12, 2007

سر دبلة الخطوبة؟؟وحكايتها؟؟؟






بمناسبة العيد كل سنه وانتو طيبين وبخير والافراح اللي فيه حبيت اقولكم علي معلومة دبله الخطوبه انا لسه عارفها علي فكره




كلنا عارفين ان الدبله فى اليمين
يبقى خطوبه

وفى الشمال يبقى جواز

بس يا ترى عارفين ليه اساسا بنلبس الدبله دى

تعالوا بقه نعرف اى حكايه الدبله دى

الحكايه ببساطة ابتديت فى عصر الرومان ( متتخضوش قوى كدة ) ايوة هى من زمان وكانت ان كل عروسين بيلبسوا طوق من الزهور فوق دماغهم ودة دليل على انهم ارتبطوا ببعضو بعدين طوق الزهور اتحول لمجرد خيط ملون بيتلف حولين اصبع الخنصر واللى بعد كدة اتطور طبعا وبقى دهب


و الماس اما بقه حكايه يمين او شمال دى بقه علشان انهم كانوا فى الخطوبه بيلبسوا الدبله فى الايد اليمين لانها الايد اللى بتحلف بيها يمين العهد وفى حاله الخطوبه هنا الطرفين كل واحد فيهم اعطى عهد للتانى انهم حيرتبطوا ببعض


وبعد الجواز بتتنقل الدبله للايد الشمال ودى بقه ليها سبب علمى لان العلم اثبت ان فى الاصبع الخنصر اللى فى الايد الشمال فيه شريان رئيسى ممتد من القلب

وهنا نقدر نقول ان الدبله بتتنقل علشان تكون بقيت قريبه من القلب او بمعنى تانى ان الزوجين كل واحد بقى فى قلب التاني




وعقبال الكل يارب واحنا كمان

Wednesday, October 10, 2007

دعــــــاء


اللهم أنت ربي لا إله إلا أنت

خلقتني وأنا أمتك

وأنا على عهدك ووعدك ما استطعت

أعوذ بك من شر ما صنعت

وأبوئ لك بنعمتك علي وأبوئ بذنبي

فاغفر لي فإنه لا يغفر الذنوب إلا أنت